បារ៉ែន៖ បើតាមប្រភពដែល EAC News ទទួលបាននៅថ្ងៃ១៤ ខែតុលានេះ មានកីឡាករបាល់ទាត់ជម្រើសជាតិកម្ពុជាចំនួន ៦រូបបានធ្វើតេស្តឃើញវិជ្ជមានកូវីដ-១៩ កំឡុងការប្រកួតបាល់ទាត់វគ្គជម្រុះ AFC Asian Cup ២០២៣ Qualifier ទល់នឹងកោះហ្គាំ។

កីឡាករទាំង ៦នាក់ដែលធ្វើតេស្តឃើញវិជ្ជមានកូវីដ-១៩ ខាងលើរួមមាន ប្រធានក្រុម គួច សុកុម្ភៈ, សារ៉េត គ្រីយ៉ា, សឿយ វិសាល, ចាន់ វឌ្ឍនាកា, កែវ សុខសិលា និង អ៊ាន ពិសី។ បើតាមព័ត៌មានដែលទទួលបាន ពួកគេទាំង ៦នាក់បានធ្វើតេស្តឃើញវិជ្ជមានកូវីដ-១៩ នេះមុនការប្រកួតទល់នឹងកោះហ្គាំ ទើបធ្វើឱ្យកីឡាករទាំង ៦នាក់ត្រូវអវត្តមាននៅជើងទី២ ដែលកម្ពុជា ឈ្នះហ្គាំក្នុងលទ្ធផល ២-១។ សរុបលទ្ធផលទាំង ២ជើងកម្ពុជាឈ្នះកោះហ្គាំ ៣-១ និងបានឡើងទៅកាន់ជុំទី៣ នៃការប្រកួតជម្រុះ AFC Asian Cup ២០២៣។

គួរឱ្យដឹងដែរថា ក្រោយចប់បេសកកម្មនេះកីឡាករក្រុមធំចំនួន ១៣នាក់ត្រូវត្រឡប់មកប្រទេសកម្ពុជាវិញ ខណៈយុវជនអាយុក្រោម ២៣ឆ្នាំដែលនៅសេសសល់ នឹងត្រូវបន្តដំណើរទៅកាន់ប្រទេសជប៉ុនដើម្បីប្រកួតវគ្គជម្រុះ AFC U-23 Asian Cup ដែលនឹងធ្វើឡើងនៅសប្តាហ៍ក្រោយនេះ។ បើតាមប្រភពពីថ្នាក់ដឹកនាំសហព័ន្ធកីឡាបាល់ទាត់កម្ពុជាបានបញ្ជាក់ថា បច្ចុប្បន្នស្ថានភាពរបស់កីឡាករទាំង ៦នាក់មានសុខភាពល្អធម្មតា និងកំពុងស្ថិតក្រោមការព្យាបាលយ៉ាងយកចិត្តទុកដាក់នៅមន្ទីរពេទ្យមួយកន្លែងក្នុងប្រទេសបារ៉ែន៕